રાજ્યમાં છેલ્લા ૨૪ કલાક દરમિયાન વ્યાપક વરસાદ નોંધાયો છે. જેમાં ૩૨ જિલ્લાના કુલ ૨૦૪ તાલુકાઓમાં મેઘરાજાએ બઘડાટી બોલાવી છે. સૌથી વધુ વરસાદ દક્ષિણ ગુજરાતના વલસાડ જિલ્લાના કપરાડામાં ૬ ઈંચ ખાબક્યો છે, જ્યારે ઉત્તર ગુજરાતના બનાસકાંઠાના ઓગડ વિસ્તારમાં પણ ૪ ઈંચ જેટલો નોંધપાત્ર વરસાદ વરસ્યો છે.
આ વરસાદી રાઉન્ડ સાથે જ રાજ્યમાં ચાલુ સીઝનનો કુલ સરેરાશ વરસાદ ૫૩.૫૭% સુધી પહોંચી ગયો છે. ઝોનવાઇઝ વરસાદની ટકાવારી પર નજર કરીએ તો:
દક્ષિણ ગુજરાત: સૌથી વધુ ૭૭.૪૨% વરસાદ નોંધાયો છે.
મધ્ય ગુજરાત: ૪૯.૨૨% વરસાદ નોંધાયો છે.
સૌરાષ્ટ્ર: ૪૩.૫૦% વરસાદ નોંધાયો છે.
ઉત્તર ગુજરાત: ૩૯.૫૩% વરસાદ નોંધાયો છે.
કચ્છ ઝોન: સૌથી ઓછો ૧૮.૮૯% વરસાદ નોંધાયો છે.
ઉત્તર ગુજરાતના જિલ્લાઓમાં મેઘરાજાએ તોફાની બેટિંગ શરૂ કરી દીધી છે. અરવલ્લી, બનાસકાંઠા અને પાટણ જિલ્લામાં મોડી રાતથી વહેલી સવાર સુધી વિજળીના કડાકા-ભડાકા અને ભારે પવન સાથે મુસળધાર વરસાદ વરસ્યો છે. કેટલીક જગ્યાએ નદીઓમાં નવા નીર આવ્યા છે, તો બીજી તરફ ભાભર અને દિયોદરમાં ખેતરો જળબંબાકાર થતાં ખેડૂતોનો પાક નિષ્ફળ જવાની ભીતિ સેવાઈ રહી છે.
અરવલ્લી જિલ્લામાં રાત્રિ દરમિયાન મેઘરાજાએ તાંડવ મચાવ્યું હતું. ભિલોડામાં માત્ર ૨ કલાકના ગાળામાં ભારે પવન અને વીજળીના કડાકા-ભડાકા સાથે ૩ ઈંચ વરસાદ ખાબક્યો હતો, જ્યારે શામળાજી પંથકમાં પણ ૨ ઈંચ જેટલો વરસાદ નોંધાયો છે. ભારે વરસાદના કારણે નીચાણવાળા વિસ્તારોમાં પાણી ભરાઈ ગયા હતા. ભિલોડાની પ્રખ્યાત ઈન્દ્રાશી નદીમાં નવા નીરની આવક થતાં સ્થાનિક ખેડૂતોમાં આનંદની લહેર ફરી વળી છે. હવામાન વિભાગ દ્વારા આજે અરવલ્લી જિલ્લામાં અત્યંત ભારે વરસાદનું ‘રેડ એલર્ટ‘ આપવામાં આવ્યું છે.
બનાસકાંઠા જિલ્લાના અમીરગઢ પંથકમાં સતત ૩ દિવસથી ધીમીધારે વરસાદ વરસી રહ્યો છે, જ્યાં ૩ દિવસમાં કુલ ૩ ઈંચ જેટલો વરસાદ નોંધાયો છે. અમીરગઢ, વિરપુર, ઈકબાલગઢ સહિતના ગ્રામ્ય વિસ્તારોમાં મોડી રાત્રે પડેલા વરસાદથી રસ્તાઓ પર પાણીની નદીઓ વહેતી જાેવા મળી હતી.
આ વરસાદથી વાતાવરણમાં ગુલાબી ઠંડક પ્રસરી ગઈ છે. જાેકે, બનાસ નદી, સ્થાનિક તળાવો અને નાળાઓમાં હજુ સુધી નોંધપાત્ર પાણીની આવક થઈ નથી. જેના કારણે ખેતી માટે પૂરતું પાણી ન મળતાં ખેડૂતોમાં ચિંતાનો માહોલ પણ યથાવત છે.
પાછલી પોસ્ટ
