
ગણપત યુનિવર્સિટી ખાતે કાન્તાબેન કાશીરામ ઇન્સ્ટિટ્યૂટ ઑફ એગ્રિકલ્ચરલ સાયન્સિસ એન્ડ રિસર્ચ (GUNI-KKIASR)ના અત્યાધુનિક ભવનનું લોકાર્પણ ઊંઝાના ધારાસભ્યશ્રી મુકેશભાઈ પટેલની ઉપસ્થિતિમાં, કરવામાં આવ્યું. કૃષિ શિક્ષણ, સંશોધન, નવીનતા અને ટકાઉ વિકાસ પ્રત્યે યુનિવર્સિટીની પ્રતિબદ્ધતાને મજબૂત બનાવતું આ ભવન એક મહત્વપૂર્ણ સીમાચિહ્ન છે. ઉત્તર ગુજરાતના અર્થતંત્ર અને ગ્રામીણ આજીવિકામાં કૃષિના મહત્વને ધ્યાનમાં રાખીને આ નવું કૃષિ ભવન આબોહવા, કુદરતી સંસાધનો અને કૃષિક્ષેત્રના પડકારોનો સામનો કરી શકે તેવા કુશળ વ્યાવસાયિકોના ઘડતરમાં યોગદાન આપશે.
કુલ ૧૧,૪૫૦ ચોરસ મીટર વિસ્તારમાં નિર્મિત આ ભવનના માળખાકીય વિકાસ માટે અમેરિકામાં વસતા ભારતીય દંપતી શ્રી કાશીરામભાઈ અને શ્રીમતી “કાન્તાબેન પટેલે રૂપિયા ૫ કરોડનું ઉદાર દાન આપ્યું છે. મુખ્ય દાતાશ્રીઓના સન્માનમાં સંસ્થાને કાન્તાબેન કાશીરામ ઇન્સ્ટિટ્યૂટ ઑફ એગ્રિકલ્ચરલ સાયન્સિસ એન્ડ રિસર્ચ” નામ આપવામાં આવ્યું છે.સમારોહનો પ્રારંભ પરંપરાગત પૂજાવિધિ સાથે કરવામાં આવ્યો હતો.
આ પ્રસંગે ગણપત યુનિવર્સિટીના પ્રમુખ અને પેટ્રન-ઇન-ચીફ પદ્મશ્રી ડૉ. ગણપતભાઈ પટેલ (દાદા)એ શિક્ષણ દ્વારા રાષ્ટ્રસેવા કરવાની શ્રી કાશીરામભાઈ પટેલની ભાવના અને શિક્ષણ ક્ષેત્રે તેમના યોગદાનની પ્રશંસા કરી હતી. તેમણે રાષ્ટ્રના વિકાસ અને સામાજિક પ્રગતિમાં શિક્ષણના મહત્ત્વ પર પણ ભાર મૂક્યો હતો. સાથે જ, લાંબાગાળાના વિકાસને સુનિશ્ચિત કરવા અને સમાજને લાભ થાય તે માટે ઉપલબ્ધ સંસાધનોનો સમજદારીપૂર્વક અને જવાબદારીથી ઉપયોગ કરવાની જરૂરિયાત પર ભાર મૂક્યો હતો.
નવી પેઢી (Gen Z) ને સંબોધતાં GUNI-KKIASRના દાતા શ્રી કાશીરામભાઈ પટેલે અમેરિકામાં વસવાટ કરતા હોવા છતાં પોતાની માતૃભૂમિ સાથેનો અતૂટ સંબંધ વ્યક્ત કર્યો હતો. તેમણે જણાવ્યું હતું કે શિક્ષણનો હેતુ સારા માનવીનું ઘડતર કરવાનો તેમજ વ્યક્તિને પોતાના વ્યવસાય પ્રત્યે સમર્પિત રહી સમાજસેવા માટે પ્રેરિત કરવાનો હોવો જોઈએ. કૃષિ, જીવન અને પ્રકૃતિ વચ્ચેના ગાઢ સંબંધ પર ભાર મૂકતાં તેમણે રાષ્ટ્રના વિકાસ માટે કૃષિવિજ્ઞાન ક્ષેત્રે સંશોધન અને નવીનતાના મહત્ત્વને ઉજાગર કર્યું હતું. તેમણે યુવાનોને પોતાના યોગદાન અને સિદ્ધિઓ દ્વારા ઇતિહાસ સર્જવા પ્રેરિત કર્યા હતા.આ પ્રસંગે શ્રી કાશીરામભાઈ પટેલના પુત્ર ડૉ. પરેશ પટેલ અને પુત્રવધૂ ડૉ. રાધા પટેલ પણ ઉપસ્થિત રહ્યાં હતાં, જેઓ બન્ને અમેરિકામાં વ્યવસાયે તબીબ તરીકે સેવાઓઆપી રહ્યા છે. વધુમાં વિદ્યાર્થીને સંબોધન કરતા ડૉ. પરેશ પટેલે જણાવ્યું હતું કે આ નવું ભવન તેમના પિતાનું સ્વપ્ન સાકાર કરે છે. નેવું વર્ષની વયે પણ શ્રી કાશીરામભાઈ દાદાની સક્રિયતા, ઉત્સાહ અને કાર્યશીલતાની પ્રશંસા કરતાં તેમને યુવા પેઢી માટે પ્રેરણાસ્રોત ગણાવ્યા હતા અને વિદ્યાર્થીઓને અભિનંદન આપ્યા હતા.
આ પ્રસંગે કોર્પોરેટ અને વિવિધ સામાજિક સંસ્થાનાં પ્રતિનિધિઓ, આસપાસના ગામડાંઓના ખેડૂત ભાઈઓ, સંસ્થામાંથી ભણીને આગળ નીકળેલા વિદ્યાર્થીઓ, તેમના વાલીઓ તેમજ અન્ય અનેક મેહમાન મહાનુભાવોએ ખાસ હાજરી આપી હતી.
ગણપત યુનિવર્સિટી ની વિવિધ વિદ્યાશાખાના ડીન, આચાર્યો પ્રાધ્યાપકો અને વિધાર્થીઓ ઉપરાંત શ્રીમતી મંજુલાબેન ગણપતભાઈ પટેલની સાથે ગણપત યુનિવર્સિટીના ડિરેક્ટર જનરલ ડૉ.આર. કે. પટેલ; સિનિયર પ્રો-વાઇસ ચાન્સેલર ડૉ. સૌરભ દવે; પ્રો વાઇસ ચાન્સેલર અને એક્ઝિક્યુટિવ રજિસ્ટ્રાર ડૉ. ગિરીશ પટેલ; બોર્ડ ઑફ ગવર્નર્સના સભ્ય શ્રી જયંતીભાઈ પટેલ; એસ્ટેટ કમિટીના કો-ચેરમેન અને ટ્રસ્ટના સભ્ય શ્રી સંદીપભાઈ શેઠ; તેમજ MDEFના ટ્રસ્ટ મંડળના સભ્યો શ્રી જયંતીભાઈ પટેલ, શ્રી સોમભાઈ રાયકા અને શ્રી પ્રવીણભાઈ પટેલ તેમજ ગણપત યુનિવર્સિટીના ફેકલ્ટી ઑફ એગ્રીકલ્ચર, એલાઇડ સાયન્સિસ એન્ડ ટેક્નોલોજીના એક્ઝિક્યુટિવ ડીન ડૉ. મૌર્વી વસાવડા પણ ઉપસ્થિત રહ્યાં હતાં.
નવા ભવનનું ઉદ્ઘાટન GUNI-KKIASR ની શૈક્ષણિક અને સંશોધન સુવિધાઓને વધુ મજબૂત બનાવવાની દિશામાં એક મહત્ત્વપૂર્ણ પગલું છે. આ સંસ્થા ગુણવત્તાયુક્ત શિક્ષણ, સંશોધન આધારિત અભ્યાસ, નવીનતા અને કૃષિ તથા સંલગ્ન ક્ષેત્રોનાં ઉભરતાં પડકારોનો સામનો કરી શકે તેવા કુશળ વ્યાવસાયિકોના ઘડતર દ્વારા કૃષિવિજ્ઞાનના વિકાસમાં યોગદાન આપવા પ્રતિબદ્ધ છે.ગણપત યુનિવર્સિટીએ આ મહત્ત્વપૂર્ણ સિદ્ધિને સાકાર કરવામાં યોગદાન આપનાર દાતાઓ, મહાનુભાવો અને તમામ સહયોગીઓ પ્રત્યે હૃદયપૂર્વક આભાર વ્યક્ત કર્યો હતો. નવું ભવન ભવિષ્યની જરૂરિયાતોને અનુરૂપ કૃષિ વ્યાવસાયિકોના ઘડતર, કૃષિ શિક્ષણ અને સંશોધનમાં શ્રેષ્ઠતાને પ્રોત્સાહન આપવા તેમજ ઉત્તર ગુજરાત અને સમગ્ર રાષ્ટ્રના વિકાસમાં યોગદાન આપવાની ગણપત યુનિવર્સિટીની પ્રતિબદ્ધતાનું પ્રતીક છે. ઉદઘાટન સમારોહનું સંચાલન પ્રો.ડો. શ્રી કોમલબેન ભટ્ટે કર્યું હતું.