- અદાણી યુનિવર્સિટી દ્વારા રોબોટિક્સ, ડ્રોન અને AI પર બે દિવસીય રાષ્ટ્રીય કોન્ક્લેવનું આયોજન કરાયું, જેમાં શૈક્ષણિક જગત, ઉદ્યોગો, સ્ટાર્ટ-અપ્સ અને નીતિ નિર્ધારકોએ ભાગ લીધો.
- અદાણી ગ્રુપ, IIT-બોમ્બે અને ઉદ્યોગ જગતના અગ્રણીઓએ સંરક્ષણ, ઉત્પાદન અને ઇન્ટેલિજન્ટ સિસ્ટમ્સમાં રહેલી તકો પર પ્રકાશ પાડ્યો.
- હેન્ડ્સ-ઓન વર્કશોપ, લાઇવ ડ્રોન પ્રદર્શન અને વિદ્યાર્થીઓ માટેની સ્પર્ધાઓ દ્વારા પ્રાયોગિક શિક્ષણ અને નવીનતા પર ભાર મૂકવામાં આવ્યો.
અદાણી યુનિવર્સિટી દ્વારા તેના અમદાવાદ કેમ્પસ ખાતે 30-31 જાન્યુઆરી, 2026 દરમિયાન રોબોટિક્સ, ડ્રોન ટેકનોલોજી, આર્ટિફિશિયલ ઇન્ટેલિજન્સ (AI) અને ઓટોનોમસ સિસ્ટમ્સ પર ધ્યાન કેન્દ્રિત કરતા બે દિવસીય રાષ્ટ્રીય કક્ષાના ટેકનિકલ સંમેલન ‘ડ્રોબોટિક્સ કોન્ક્લેવ 2026’ (Drobotics Conclave 2026) નું સફળતાપૂર્વક આયોજન કરવામાં આવ્યું હતું. આ કાર્યક્રમમાં દેશભરમાંથી 279 સહભાગીઓ જોડાયા હતા, જેમાં શિક્ષણવિદો, ઉદ્યોગ વ્યાવસાયિકો, સ્ટાર્ટ-અપ લીડર્સ, સંશોધકો અને વિદ્યાર્થીઓએ ભવિષ્યની ટેકનોલોજી પર મંથન કર્યું હતું.
અદાણી ડિફેન્સ એન્ડ એરોસ્પેસે ટાઇટલ સ્પોન્સર તરીકે આ કોન્ક્લેવને સહયોગ આપ્યો હતો. સાથે જ ગુજરાત કાઉન્સિલ ઓન સાયન્સ એન્ડ ટેકનોલોજી (GUJCOST), ઇન્સ્ટિટ્યૂટ ઓફ ઇલેક્ટ્રિકલ એન્ડ ઇલેક્ટ્રોનિક્સ એન્જિનિયર્સ (IEEE) ગુજરાત સેક્શન એન્ડ સ્ટુડન્ટ સ્ટાર્ટ-અપ એન્ડ ઇનોવેશન પોલિસી (SSIP) નો પણ મહત્વનો સહયોગ પ્રાપ્ત થયો હતો.
ઉદ્ઘાટન સત્રમાં અદાણી યુનિવર્સિટીના પ્રોવોસ્ટ પ્રો. ધવલ પૂજારાએ મહેમાનોનું સ્વાગત કરતા ઓટોમેશનના યુગમાં અદ્યતન ટેકનોલોજી માટે સજ્જ થવાની જરૂરિયાત પર ભાર મૂક્યો હતો. મુખ્ય અતિથિ તરીકે ઉપસ્થિત અદાણી ગ્રુપના ચીફ ટ્રાન્સફોર્મેશન ઓફિસર શ્રી સુદીપ્તા ભટ્ટાચાર્યએ સંરક્ષણ અને ઉત્પાદન ક્ષેત્રે ડ્રોન ટેકનોલોજીની વ્યૂહાત્મક ભૂમિકા અને યુવા સંશોધકો માટે રહેલી તકો વિશે વાત કરી હતી. ગેસ્ટ ઓફ ઓનર તરીકે IIT બોમ્બેના ‘e-Yantra’ પ્રોજેક્ટના સ્થાપક પ્રો. કવિ આર્યાએ પ્રાયોગિક શિક્ષણ અને ઇજનેરી ક્ષમતા નિર્માણ પર ભાર મૂક્યો હતો.
કોન્ક્લેવના પ્રથમ દિવસે પ્રો. આર્યાના સંચાલન હેઠળ ‘રોબોટિક્સ અને ડ્રોન ક્ષેત્રે ઇનોવેશન અને સ્ટાર્ટ-અપ ઇકોસિસ્ટમ’ પર પેનલ ચર્ચા યોજાઈ હતી. જેમાં ઉદ્યોગના પડકારો અને સંશોધનને વ્યાપારી સ્તરે સફળ બનાવવા મંથન કરવામાં આવ્યું હતુ. દિવસના અંતે અદાણી ડિફેન્સ એન્ડ એરોસ્પેસના નિષ્ણાતો દ્વારા 10 કિલો પેલોડ ક્ષમતા ધરાવતા ડ્રોનનું લાઇવ પ્રદર્શન અને હેન્ડ્સ-ઓન વર્કશોપ યોજાયા હતા.
બીજા દિવસે ‘ફિઝિકલ આર્ટિફિશિયલ ઇન્ટેલિજન્સ’ અને ‘ઈન્ડસ્ટ્રીયલ રોબોટિક્સ’ પર નિષ્ણાતોના વ્યાખ્યાન યોજાયા હતા. ત્યારબાદ યોજાયેલી ‘રોબો રેસ’ અને ‘મેઝ સોલ્વર’ જેવી સ્પર્ધાઓમાં 37 ટીમોએ ભાગ લીધો હતો, જેમાં વિજેતા ટીમોને કુલ ₹1,00,000 ના ઇનામો આપવામાં આવ્યા હતા.
સમાપન સત્રમાં GUJCOST ના પ્રિન્સિપલ સેક્રેટરી ડો. નરોત્તમ સાહુએ વિદ્યાર્થીઓને દેશના વિકાસમાં ટેકનોલોજીના માધ્યમથી યોગદાન આપવા પ્રોત્સાહિત કર્યા હતા. આ કોન્ક્લેવ દ્વારા અદાણી યુનિવર્સિટીએ ઉદ્યોગ-સંલગ્ન શિક્ષણ અને મજબૂત સ્ટાર્ટ-અપ ઇકોસિસ્ટમ વિકસાવવા પોતાની પ્રતિબદ્ધતાનો પુનરોચ્ચાર કર્યો છે.
