ગુજરાતમાં વસ્તી ગણતરી પ્રક્રિયાને લઈને મહત્વપૂર્ણ જાહેરાત કરવામાં આવી છે. કેન્દ્ર સરકાર દ્વારા વસ્તી ગણતરી અંગેનું સત્તાવાર નોટિફિકેશન જાહેર કરવામાં આવ્યું છે, જેના આધારે રાજ્યમાં પ્રથમ તબક્કાની કામગીરી આગામી જૂન માસથી શરૂ થશે.
સરકારના આયોજન મુજબ ૧ જૂનથી ૩૦ જૂન સુધી રાજ્યભરમાં “હાઉસ લિસ્ટિંગ” પ્રક્રિયા હાથ ધરાશે. આ દરમિયાન ગણતરી કર્મચારીઓ ઘર-ઘર જઈને રહેણાંક મકાનો, પરિવારો અને મૂળભૂત સુવિધાઓ સંબંધિત માહિતી એકત્રિત કરશે. સમગ્ર પ્રક્રિયા ૩૦ દિવસની અંદર પૂર્ણ કરવાની રહેશે.
આ વખતે વસ્તી ગણતરીમાં ડિજિટલ વ્યવસ્થાને પણ પ્રાથમિકતા આપવામાં આવી છે. નાગરિકોને પોતે જ ઓનલાઇન માધ્યમ દ્વારા પોતાની માહિતી નોંધાવવાની સુવિધા આપવામાં આવશે. સરકારનો દાવો છે કે આ પદ્ધતિથી પ્રક્રિયા વધુ ઝડપી, પારદર્શક અને સરળ બનશે. રાજ્ય સરકાર તથા વહીવટી તંત્ર દ્વારા ગણતરી કામગીરી માટે તૈયારીઓ શરૂ કરી દેવામાં આવી છે. સંબંધિત કર્મચારીઓને તાલીમ આપવાની પ્રક્રિયા પણ ટૂંક સમયમાં શરૂ થશે.
