ભારતીય વડાપ્રધાન નરેન્દ્ર મોદી રવિવારે સેશેલ્સની સ્વતંત્રતાની 50મી વર્ષગાંઠના અવસરે રાજધાની વિક્ટોરિયામાં આયોજિત રાષ્ટ્રીય દિવસ સમારોહની ઉજવણીમાં સામેલ થયા. વડાપ્રધાન મોદીએ કહ્યું કે આ સમારોહમાં સામેલ થવું તેમના માટે સન્માનની વાત છે. તેમણે સેશેલ્સના લોકોને સ્વતંત્રતા દિવસની શુભેચ્છાઓ પાઠવી.
વડાપ્રધાન મોદીએ આજે સવારે એક્સ પર લખ્યું, ”સેશેલ્સના રાષ્ટ્રીય દિવસ સમારોહમાં સામેલ થવું મારા માટે સન્માનની વાત છે. આ સમારોહ સેશેલ્સની આઝાદીની સુવર્ણ જયંતિનું પ્રતીક છે. આ અવસર છેલ્લા પચાસ વર્ષમાં સેશેલ્સના લોકોની શાનદાર યાત્રાને એક યોગ્ય શ્રદ્ધાંજલિ હતી.” તેમણે કહ્યું, ”ભારતને સેશેલ્સના વિકાસના સફરમાં એક ભરોસાપાત્ર મિત્ર અને ભાગીદાર તરીકે તેની સાથે ઊભા રહેવા પર ગર્વ છે. અમારી ભાગીદારી, સહિયારા મૂલ્યો અને લોકો વચ્ચેના પરસ્પર સંબંધો મજબૂત થવા સાથે, વધુ ઊંડી થતી જઈ રહી છે. મને પૂરો વિશ્વાસ છે કે, આવનારા સમયમાં અમારી મિત્રતા વધુ મજબૂત થશે.”
ભારતીય વિદેશ મંત્રાલયના પ્રવક્તા રણધીર જયસ્વાલે એક્સ પર કહ્યું, “વડાપ્રધાન નરેન્દ્ર મોદી સેશેલ્સની આઝાદીની 50મી વર્ષગાંઠના અવસરે આયોજિત રાષ્ટ્રીય દિવસની ઉજવણીમાં ‘મુખ્ય અતિથિ’ તરીકે સામેલ થયા અને આવું સન્માન મેળવનારા તેઓ પ્રથમ ભારતીય વડાપ્રધાન બન્યા.” તેમણે કહ્યું, “આ પરેડમાં ભારતીય નૌકાદળ અને સેનાની ટીમોવાળી એક ભારતીય કૂચ ટુકડીએ ભાગ લીધો. ભારતીય કૂચ એકમનો ભાગ એક ભારતીય નૌકાદળ વાદ્યવૃંદ પણ રહ્યું. આ ભારત અને સેશેલ્સની ગાઢ અને વિશેષ ભાગીદારી દર્શાવે છે. એક ખાસ પહેલ હેઠળ આઈએનએસ તરકશ અને આઈએનએસ ઇક્ષકને બંદર વિક્ટોરિયામાં ઊભા રાખવામાં આવ્યા. આ સેશેલ્સ સાથે ભારતની જૂની મિત્રતા દર્શાવે છે. વડાપ્રધાન મોદીએ આ ઐતિહાસિક અવસરે સેશેલ્સના લોકોને ભારત તરફથી શુભેચ્છાઓ પાઠવી.”
