કોંગ્રેસ વધુ એક યાત્ાર યોજવા જઇ રહ્યું છે.. આ વખતે મતદાર અધિકાર યાત્રા યોજાશે જે બિહારથી આરંભાશે.
બિહારમાં મતદાર યાદીના ખાસ સઘન સુધારા અને કથિત મત ચોરીના વિરોધમાં કોંગ્રેસની આગેવાની હેઠળનું ભારતીય ગઠબંધન 17 ઓગસ્ટથી ‘મતદાર અધિકાર યાત્રા’ શરૂ કરવા જઈ રહ્યું છે. આ અંગે, કોંગ્રેસ મુખ્યાલય ખાતે પાર્ટી પ્રવક્તા પવન ખેડાએ, તેને લોકશાહીના રક્ષણ માટે એક ઐતિહાસિક પગલું ગણાવ્યું. તેમણે કહ્યું કે, આ એક એવી યાત્રા હશે, જે લોકશાહીને દિશા આપશે. રાહુલ ગાંધી જ્યારે પણ કોઈ યાત્રા પર નીકળ્યા છે, ત્યારે દેશના લોકશાહીએ વળાંક લીધો છે.
ખેડાએ કહ્યું કે, બિહારમાં શરૂ થઈ રહેલી યાત્રાનો ઉદ્દેશ્ય લોકોને જાગૃત કરવાનો છે, કારણ કે કાવતરાખોરો હજુ પણ મત ચોરી કરવાનો પ્રયાસ કરી રહ્યા છે. આ યાત્રા 17 ઓગસ્ટે સાસારામથી શરૂ થશે અને 01 સપ્ટેમ્બરે પટણામાં એક વિશાળ રેલી સાથે સમાપ્ત થશે. આ 16 દિવસની પદયાત્રામાં લગભગ 1,300 કિલોમીટરનું અંતર કાપવામાં આવશે. યાત્રાના છેલ્લા દિવસે, ઇન્ડી ગઠબંધનના ટોચના નેતાઓ પણ પટનામાં જોડાશે.
કોંગ્રેસના પ્રવક્તા ખેડાએ ચૂંટણી પંચ પર નિશાન સાધતા કહ્યું કે, જો આયોગ ‘ડબલ એન્જિન’ સરકારનો ભાગ બનશે, તો તેને સ્વીકારવામાં આવશે નહીં. આ યાત્રા ‘એક વ્યક્તિ-એક મત’ના અધિકાર માટેની લડાઈ છે અને તેમાં દરેક બિહારીની ભાગીદારી જરૂરી છે. કોંગ્રેસે આ પહેલને લોકશાહી અને બંધારણના રક્ષણ માટે એક સીમાચિહ્નરૂપ ગણાવી છે. ખેડાએ કહ્યું કે, આ માત્ર રાજકીય યાત્રા નથી, પરંતુ લોકોના અસ્તિત્વ અને અધિકારો માટેની લડાઈ છે.
